Benennidu

Acurtziadi cun assèliu.

So Adelàsia de Torres.

Como lassa·ti giughere a connòschere sa bestimenta mea.

Ascurta sa 'oghe mea chi at a ghiare sas manos tuas.

Cumintza dae su capu.

Imbarat in manera delicada sos pòddighes subra sa conca mea.

As a intèndere unu cuguttu particulare.

Una fasca imbòligat sa cara e una àtera sos cherbeddos, si mutit gebende.

Est fata de linu craru, est lèbiu e rapizosu a su tocu.

Sìmbulu de modèstia. Est obbrigatòriu pro sas fèminas cojuadas.

Sa fasca subra de sos cherbeddos frima unu velu ampru, chi torrat a rùere subra de sos coddos.

Fintzas custu est in linu fine, comente una mussolina.

Como fala a bellu cara a sos coddos.

Inoghe su tessutu càmbiat.

Sa prima beste chi sas manos tuas adobiant est su manteddu.

Est ampru, grave, fatu de lana ruja.

Si curres sos pòddighes longu sos oros as a intèndere unu disinnu damascadu, una decoradura tèssida in su tessutu.

A s'artària de sas petorras podes iscoberrere una cadenita metàllica.

Tenet unidos sos duos oros de su manteddu.

Suta de sos pòddighes as a intèndere su cuntrastu intre su tessutu calente e su metallu fritu.

Como aberi su manteddu cun sas manos.

Suta agatas sa sopratunica.

Est fintzas issa ruja e aberta in dae in antis.

Fintzas inoghe, longu sos oros, as a pòdere iscoberrere su motivu damascadu chi decorat su tessutu.

Como fala a su chintu.

Inoghe agatas una chintorza de còrgiu, lisa e resistente.

A sa chintorza est apicada una busciachita pitica: sos terramannesos li narant scarsella.

Est fata de seda damascada.

Colat a bellu sas puntas de sos podighes subra de sa superfìtzie.

As a intèndere su disinnu de su tessutu e subra de s'oru inferiore sas frunzas de filu de seda.

Fala ancora.

Suta de sa sopratunica s'agatat sa tùnica biaita.

Est sa beste prus interna e ruet dereta longu su corpus.

In fines fala finas a sos pees.

Inoghe giuto botas de pedde, cun sa punta, comente fiat sa moda in su tempus meu.

Como connosches comente so bestida.